Monday, May 24, 2010

మొదటి పాట

దేనితో మొదలు పెట్టాలి.? ఎలా ముగించాలి..? ముగింపు సంగతి కాస్త పక్కన పెడితే సిరివెన్నెల గారి గురించి ఎలా మొదలు పెట్టాలి అన్న విషయం ఎంతకీ అంతు పట్టడం లేదు. ఏదో చిన్న పిల్లకాలువ గురించి ఐతే నాలుగు ముక్కల్లో / వాక్యాల్లో తేల్చెయ్యొచ్చు. కానీ సిరివెన్నెల సీతారామ శాస్త్రి గారి గురించి నాలుగు వాక్యాల్లో తేల్చడం అంటే అరచేతుల్లో మహా సముద్రాన్ని పట్టుకుందాం అన్నంత అత్యాశ అవుతుంది. సూర్య భగవానుడి ని ఒంటి చేతి మీద బంతి లా ఆడించడం అంత అతిశయోక్తి అవుతుంది.
ఆయన ఒక మహార్ణవం. ఆయన కలం కోటి సూర్యుల తేజం. .వర్ణనాతీతం... ఆయన రాసే పాటల లోని పదాల అల్లిక విరజాజుల మాల. ఆస్వాదించే కొద్దీ ఆ సౌరభాలు మనసు మూలల్లోకి వెళ్లి ఒక అద్వితీయానుభూతి ని ప్రసాదిస్తాయి. ఇక్కడ మీతో పంచుకోవాల్సిన విషయం ఒకటి ఉంది. సిరివెన్నెల గారి మీద ఇంత గౌరవం అనుకోండి లేదా భక్తి అనుకోండి ( అది తమరికే వదిలేస్తున్నాను) మొదలైంది ఒక పాట తో... మీరందరూ 'నేనున్నాను' అన్న చిత్రం చూసే ఉంటారు అనుకుంటున్నాను. అందులో ' ఏ శ్వాస లో చేరితే ' పాట. అంతకు ముందు కూడా సిరివెన్నెల గారు చాలా పాటలు రాసారు. అవన్నీ అద్భుతాలే. కానీ నాకు ఊహ తెలిసిన తరువాత ఒక పాట వినగానే ఆ పాట రాసింది ఎవరో తెలుసుకుని ఆ పాటని మళ్ళీ మళ్ళీ విని పూర్తి గా ఆస్వాదించిన పాట ఇది. దాని కారణం గానే నా బ్లాగ్ ని కూడా ఇదే పాట తో మొదలు పెడదాం అని నిశ్చయించుకున్నాను.
పాట ఇలా సాగుతుంది.


ఏ శ్వాస లో చేరితే గాలి గాంధర్వమౌతున్నదో ..
ఏ మోవి పై వాలితే మౌనమే మంత్రమౌతున్నదో ..
ఆ శ్వాస లో నే లీనమై ఆ మోవి పై నే మౌనమై
నిను చేరనీ మాధవా.. "ఏ శ్వాస లో "


మునులకు తెలియని జపములు జరిపినదా మురళీ సఖీ..
వెనుకటి బ్రతుకున చేసిన పుణ్యమిదా..
తనువున నిలువున తొలచిన గాయములే తన జన్మ కీ
తరగని వరముల సిరులని తలచినదా..
కృష్ణా నిన్ను చేరిందీ అష్టాక్షరి గ మారిందీ..
ఎలా ఇంత పెన్నిధీ వెదురు తాను పొందినదీ
వేణు మాధవా నీ సన్నిధీ... "ఏ శ్వాస లో "


చల్లని నీ చిరునవ్వులు కనపడకా కను పాపకీ
నలువైపులా నడి రాతిరి ఎదురవదా..
అల్లన నీ అడుగుల సడి వినపడక హృదయానికీ
అలజడితో అణువణువూ తడబడదా..
నీవే నడుపు పాదమిదీ నీవే మీటు నాదమిది
నివాళి గా నా మదీ నివేదించు నిమిషమిది..
వేణు మాధవా నీ సన్నిధీ.. "ఏ శ్వాస లో "


ఎంత అద్భుతమైన పాట.. చిత్రం లో 'అను' జీవితానికి(శ్రియ పోషించిన పాత్ర) పాటలో వెదురు/మురళి పాత్ర కి ఎంత గా పొంతన కుదిరిందంటే అసలు ఆ పాట కోసమే అను పాత్ర ని సృష్టించారేమో అన్నంత గా..
ఈ పాట లో ఒక్కొక్క వాక్యం ఒక్కొక్క అద్భుతం.. గాలి గాంధర్వం అవుతుంది కృష్ణుడి శ్వాసలో.. ఎంత గొప్ప ప్రయోగం..!! ఆయన పెదవుల పై మౌనం కూడా మంత్రం అవుతుంది.
ఎందరో మునీశ్వరులకు కూడా తెలియని జపములు జరిపి ఉంటుందేమో ఆ మురళి.. లేకపోతే ఆ జగన్నాటక సూత్రధారితో అంత సఖ్యతా..? లేదంటే ఆది పూర్వ జన్మ సుకృతం ఐనా అయ్యుండొచ్చు.. ఒక వెదురు ముక్క కృష్ణుడి ని చేరి అష్టాక్షరి గా మారింది.. ఎంత అందమైన నిజం.. ఆ మనోహరుడి చేతిలో సప్త స్వరాలు పలికించు వేణువు ఊహ మనసుని పులకింపజేస్తుంది. మరి అంతటి అదృష్టం ఆ వెదురు ముక్క ఎలా పొందిందంటారు..??
ఆ చిరునవ్వులు కనపడక పోతే చీకటి మాత్రమే కనిపిస్తుందట.. మురళీధరుడి అడుగుల సడి హృదయానికి వినిపించకపోతే అలజడి తో అణువణువూ తడబడుతుంది. ఈ పాదాన్ని నువ్వే నడపాలి.. ఈ నాదాన్ని నువ్వే మీటాలి. ఇక కొసమెరుపు.. రాధికా హృదయ రాగాంజాలీ నీ పాదముల వ్రాలు కుసుమంజలీ ఈ గీతాంజలి..
విచిత్రం ఏమిటంటే పై వాక్యాలన్నీ ఆ కృష్ణ భగవానుడి కి ఎంత పొంతన గా ఉన్నాయో ఆ చిత్రం లోని కథా నాయకుడి పాత్ర కి అంటే పొంతన గా ఉంటాయి. ముఖ్యం గా "తనువున నిలువున తొలచిన గాయములే తన జన్మ కీ తరగని వరముల సిరులని తలచినదా" ఈ వాక్యం అనుపమానం.. ఒక వెదురు ముక్క కి దాని తనువంతా గాయాలతో నిండి ఉన్నా ఆ గాయాలే దాని అదృష్టం అంట. ఆ గాయాల కారణం గానే ఆ మురళీధరుడి చేతి లో ఉండే అదృష్టాన్ని పొందింది. అలాగే అను పాత్ర కు జరిగే కొన్ని ఎదురు దెబ్బల కారణం గా కథానాయకుడికి దగ్గర అవుతుంది. అది తన అదృష్టం గా భావిస్తుంది.
సిరివెన్నెల గారి పాటల్లోకెల్లా ఇది గొప్ప పాట అని చెప్పను. ఇంతకంటే అద్భుతమైన వేల పాటలు ఆయన కలం నుండి అల్లుకుని విరజాజుల మాలలు అయ్యాయి. నా హృదయాన్ని మీటిన మొదటి పాటగా ఈ బ్లాగ్ లో దీనిని పరిచయం చేస్తున్నాను. మనల్ని ఉక్కిరి బిక్కిరి చేసే ఆయన పాటల అలల్ని ఎన్నిటినో మీ ముందుకు తీసుకు వస్తాను.
ఆ పాటల ఉప్పెనను స్వీకరించడానికి సిద్ధంగా ఉంటారని ఆశిస్తూ.. మీ సలహాల కోసం ఎదురు చూస్తూ...
మీ..
అపర్ణ..

2 comments:

శిశిర said...
అపర్ణ గారు, బాగుందండి మీ బ్లాగు. మీ ప్రయత్నం కూడా. నేనూ సిరివెన్నెలగారి అభిమానినే. విరజాజిపూలు వర్షపు చుక్కలతో ఎంత బాగుందో ఫోటో. బాగా రాస్తున్నారు.
సిరివెన్నెల said...
ధన్యవాదాలు శిశిర గారు. క్షమించాలి, ఆలస్యానికి :). నిజానికి నాకు విరజాజి పూల ఫొటో దొరకలేదండీ.. ఆ ఫొటో లో ఉన్న పూలని మేము సన్నజాజులు అంటాం.. కొందరు వీటినే విరజాజులు అంటారంట. మీరు కూడా వీటినే విరజాజులు అంటారా..?

2 comments:

శిశిర said...

అపర్ణ గారు,
మీ ఫోటోలోనివి సన్నజాజులే. వీటి కాడలు పొడుగ్గా, పువ్వులు విరజాజులకంటే కొంచెం పెద్దగా ఉంటాయి. విరజాజులు చిన్న చిన్నగా ఉంటాయి. మీరు చక్కగా రాసుకుంటూ ఒక ఫోటొ పెట్టుకుంటే ఆ ఫోటో గురించి డిస్కషన్ అవసరం లేదనిపించి విరజాజులు బాగున్నాయి అన్నాను. ఏవైనా జాజులే కదండి. :)

మనసు పలికే said...

శిశిర గారూ!
మీరు చెప్పింది నిజమేనండీ.. :) నిజానికి నేను కుడా అదే భావనతో ఈ ఫోటో పెట్టాను.:)